GEGURITAN ANYAR

Sugeng pepanggihan malih kalih kula. Kala wingi dereng  gadhah wekdal kangge ngapload babagan jawa malih. Sakniki nembe kemawon saged ngapload . Babagan ingkang kula apload sakniki inggih menika geguritan. 

GETIRING ATI

kaanggit dening Ni'am Krisna

Rong puluh taun anggonku napak aneng ndonya

Ana pitakonan kang sliwer aneng pikiranku

Apa iya bisa aku ngawujudi gegayutanku marang biyung lan ramaku?

Apa mung bisa angen-angen kaya cebol hanggayuh lintang kang sumebar?

Samono uga ati kang nandhang getir

Mesthi anggegulang amrih tatag teteg yen ta nrajang prahara

Tembung kang njedhul kenthel bisa cuwer ajer

Kanthi alusing wicara lemes lumering sutra ngeyomi dhuhkita ing jiwangga

Dhuh Gusti, tetegana lakunira supaya bisa nggayuh lintang kang dadi gegayutanku

GEGURITAN ANYAR

DHEDHETING RATRI

kanggit dening Ni'am Krisna

Sunaring sang surya wus angslup ing sisih kulon

Para kadang tansah ngukukuti pagaweyane

Ngrumpaka petenging akasa mesthi bakal mungkur

Samono uga gumanti dening sunaring rembulan nabrak adarati

Ngupadi lowahan niliki sang Pungguk kang tansah kangen, lara branta.

Sabanjure...

Rahina wus manjalma, ngowahi punjering suksma

Kadya antenging tirta ing tlaga biru

Nglurubi sadaya sekeling driya

Karana kangene durung kawales.